مقبوضہ کشمیر:حریت رہنمامصدق عادل انتقال کر گئے، رہنمائوں کاخراج عقیدت

سرینگر (اے پی پی)کل جماعتی حریت کانفرنس کے رہنما محمد مصدق عادل گزشتہ روز اپنے آبائی قصبے سوپور میں انتقال کر گئے۔حریت رہنمائوں اور تنظیموں نے مرحوم کو شاندار خراج عقیدت پیش کیا ، سوگوار خاندان کے ساتھ ہمدردی کا اظہار کیاہے۔ادھرپنڈتوں پر مشتبہ حملوں کے بہانے کشمیریوں کی مزید خونریزی کیلئے بھارتی وزیر داخلہ امیت شاہ کی خصوصی ہدایات پربھارتی فوجیوں نے غیر قانونی طور پر بھارت کے زیر قبضہ جموں و کشمیر میں تلاشی اور محاصرے کی پرتشددکارروائیوں کے ذریعے نہتے کشمیریوں پر ڈھائے جانیوالے مظالم میں بے پناہ اضافہ کر دیا ۔ کشمیر میڈیاسروس کے مطابق بھارتی فوج اورپولیس اہلکاروں نے وادی کشمیرمیں داخلی اور خارجی مقامات کی ناکہ بندی کر کے گھر گھر تلاشی، مکینوں کو ہراساںاور گھریلو سامان کی توڑ پھوڑ کی ۔ نیشنل کانفرنس کے صدر فاروق عبداللہ نے پونچھ کے علاقے سرنکوٹ میں پارٹی کارکنوں سے گفتگو کرتے ہوئے کہا کہ بی جے پی کی بھارتی حکومت جموں و کشمیر کے حوالے سے اپنی روایتی ہٹ دھرمی پر مبنی پالیسی پر عمل پیرا ہے۔