سرمایہ کاری کیلئے سازگار ماحول کی فراہمی اولین ترجیح،ڈاکٹرعائشہ غوث

اسلام آباد (نمائندہ جنگ) وزیرمملکت خزانہ وریونیو ڈاکٹر عائشہ غوث پاشا نے کہاکہ حکومت ملک میں براہ راست غیرملکی سرمایہ کاری کا خیرمقدم کرتی ہے اور ملک میں کاروبار اورسرمایہ کاری کیلئے سازگار ماحول کی فراہمی کیلئے اقدامات کئے جارہے ہیں۔ انہوں نے ان خیالات کا اظہار میسرزلورئیل پیرس کے وفد سے ملاقات کے موقع پر کیا ، وفد کی قیادت سی ایف او احمدشاہ نے کی ۔وفد نے وزیرمملکت کو پاکستان میں براہ راست غیرملکی سرمایہ کاری کو راغب کرنے کیلئے کمپنی کے کردار اور اس حوالے سے ایشوز سے آگاہ کیا۔ وزیر مملکت نے کہاکہ ملک میں کاروبار،تجارت اور سرمایہ کاری کیلئے سازگار ماحول کی فراہمی ہماری اولین ترجیح ہے اور اس حوالہ سے تاجروں و سرمایہ کاروں کو سہولیات فراہم کی جائیگی۔