وزیر خزانہ کی انڈونیشیا،ملائیشیاسےخوردنی تیل درآمد کا عمل تیز کرنے کی ہدایت

اسلام آباد(کامرس رپورٹر )وزیر خزانہ مفتاح اسماعیل نے متعلقہ حکام کو ہدایت کی ہے کہ وہ ملائیشیا اور انڈونیشیا سے خوردنی تیل کی درآمد کے عمل کو تیز کریں تاکہ صارفین کیلئے اسکی آسان فراہمی کو یقینی بنایا جا سکے اور اسکی قیمتوں میں استحکام رکھا جا سکے، وفاقی وزیر نے خوردنی تیل کی دستیابی سے متعلق کمیٹی کے اجلاس کی صدارت کی، وزیر صنعت و پیداوار سید مرتضیٰ محمود، وزیر تعلیم رانا تنویر حسین،وزارت صنعت وپیداوار اور تجارت کے سیکرٹریز، وناسپتی مینوفیکچررز ایسوسی ایشن کے نمائندوں اور سینئر افسران نے اجلاس میں شرکت کی اس موقع پر سیکرٹری صنعت نے کمیٹی کو ملک میں خوردنی تیل کے سٹاک ، انڈونیشیا اور ملائیشیا سے خوردنی تیل کی درآمد کی صورتحال سے آگاہ کیااوربتایاکہ ملک میں خوردنی تیل کا وافر ذخیرہ موجود ہے، اس ماہ کے دوران ملائیشیا اور انڈونیشیا سے خوردنی تیل کے ٹینکرز پہنچنے سے سٹاک کی پوزیشن بہتر ہوگی اور قیمت کو مستحکم کرنے میں مدد ملے گی،یہ بھی بتایا گیا کہ اس سلسلے میں وزیر صنعت و پیداوار حکام سے اہم بات چیت کیلئے انڈونیشیا روانہ ہو رہے ہیں، رانا تنویر حسین نے وناسپتی مینوفیکچررز ایسوسی ایشن کے نمائندوں سے کہا کہ وہ اپنی قیمتوں پر نظر ثانی کریں اور عام آدمی کیلئے قیمتوں کو کم کرنے میں کردار ادا کریں۔