امریکہ میں پیٹرول کی قیمت پہلی مرتبہ 5ڈالر فی گیلن سے بڑھ گئی

واشنگٹن (اے ایف پی /جنگ نیوز )امریکہ میں پیٹرول کی قیمت پہلی مرتبہ پانچ ڈالر فی گیلن سے بڑھ گئی ہے۔برطانوی میڈیا کے مطابق ہفتے کو پیٹرول کی قیمت 5 ڈالر فی گیلن سے بڑھ گئی جبکہ ایک دن پہلے یہ قیمت اوسطا 4اعشاریہ 9ڈالر فی گیلن تھی۔معاشی ماہرین کے مطابق امریکہ میں اگر پیٹرول کی قیمت پانچ ڈالر فی گیلن سے زیادہ پر برقرار رہی تو عام صارفین کی طلب میں کمی بھی واقع ہو سکتی ہے۔ایک سال پہلے تک امریکہ میں پیٹرول کی اوسط قیمت 3اعشاریہ 07ڈالر تھی جس میں اب تک 62 فیصد کا اضافہ ہو چکا ہے۔پیٹرول کی بڑھتی ہوئی قیمتیں امریکی صدر جو بائیڈن اور ان کی جماعت ڈیموکریٹ پارٹی کے لیے سر دردی کا باعث بن گئی ہیں، بالخصوص ایسے وقت میں جب رواں سال نومبر میں وسط مدتی انتخابات بھی متوقع ہیں۔