چین کی اقوام متحدہ کے ماہرین کے الزامات کی مذمت

جنیوا(شِنہوا)جنیوا میں اقوام متحدہ (یو این)میں چینی مشن نے اقوام متحدہ کے بعض ماہرین کی طرف سے چین کے خلاف لگائے گئے الزامات کی تردید کرتے ہوئے کہا ہے کہ انہوں نے اپنے مینڈیٹ کا غلط استعمال کرتے ہوئے چین مخالف قوتوں کے ایک سیاسی آلہ کار کا کردار ادا کیا۔ چینی مشن کے ترجمان نے ایک بیان میں کہا کہ چین کی انسانی حقوق کی زبردست کامیابیوں کو نظر انداز کرتے ہوئے، اقوام متحدہ ماہرین کے اس گروپ نے امریکہ سمیت مغربی ممالک اور چین مخالف قوتوں کی طرف سے گھڑے گئے جھوٹوں اور غلط معلومات کی توثیق کی۔ ترجمان نے کہا کہ انہوں نے اپنے مینڈیٹ کا غلط استعمال کیا اور انسانی حقوق کونسل کے 50 ویں اجلاس کے موقع پر چین پر الزام تراشی کے لیے امریکہ کے ساتھ تعاون کیا، جو چین کو آگے بڑھنے سے روکنے کی امریکی حکمت عملی، تسلط اور اقتدار کی سیاست کے مفادات کو پورا کرنےمیں اس کا ساتھ دینے کے لئے انسانی حقوق کونسل کو اغوا کرنے کی ناکام کوشش ہے۔