وزیراعظم عنقریب میزانیہ ساز ٹیموں کیلئے روایتی اعزازیئے کی منظوری دینگے

اسلام آباد (حنیف خالد) وزیراعظم شہباز شریف‘ وفاقی وزیر خزانہ مفتاح اسماعیل اور چیئرمین ایف بی آر عاصم احمد سے جلد انکی میزانیہ ساز ٹیموں کی فہرستیں منگوائیں گے جنہوں نے وفاقی بجٹ 2022-23ء کی تیاری کیلئے دن رات محنت کی۔ دو ہفتے تک ایف بی آر اور وزارت خزانہ کے دروازے عام مہمانوں کیلئے بند کئے رکھے‘ اسی کے ساتھ بدھ جمعرات جمعہ کو تین دن دو راتیں ایف بی آر اور وزارت خزانہ کے اندر 24گھنٹے میزانیہ سازی کے کام میں بسر کی۔ انہیں کئی کئی مہینوں کی تنخواہ کے برابر اعزازیہ دیئے جانے کا امکان ہے۔ ماضی میں یہ چھ سات تنخواہوں کے برابر بھی دیا جاتا رہا‘ لیکن ہو سکتا ہے وزیراعظم شہباز شریف ان ٹیموں کیلئے ملک کی موجودہ مشکل مالی صورتحال کی بناء پر تین سے چار مہینوں کی تنخواہ کی رقم کے مساوی اعزازیہ کا اعلان کرے۔ اعزازیئے کی ادائیگی جون کی تنخواہ کے ساتھ یکم جولائی 2022ء کو حکومت کرے گی۔