پرائس کنٹرول ایکٹ پر عملدرآمد کیلئے انتظامیہ کی ہر ممکن معاونت کی جائیگی،مہوش سلطانہ

چکوال(نمائندہ جنگ)ایم پی اے محترمہ مہوش سلطانہ نے کہا ہے کہ حکومتِ پنجاب کی مارکیٹ ریلیف پالیسی کے مطابق ضلع میں عوام کو ریلیف فراہم کرنے کے لئے پرائس کنٹرول میکانزم کا استحکام بنیادی ضرورت ہے تاکہ عوام کو معیاری اشیائے ضروریہ کے مقررہ نرخوں پر حصول میں کسی دقت کا سامنا نہ کرنا پڑے۔ انہوں نے یہ بات ڈپٹی کمشنر عدنان محمود اعوان کے ہمراہ ڈسٹرکٹ پرائس کنٹرول کمیٹی کے اجلاس کی صدارت کرتے ہوئے کہی۔ انہوں کہا کہ ضلع میں پرائس کنٹرول ایکٹ کی عملداری یقینی بنانے میں ضلعی انتظامیہ کو ہر ممکن معاونت فراہم کی جائے گی۔ ڈپٹی کمشنر نے کہا کہ حکومتِ پنجاب کے احکامات کی روشنی میں ضلعی انتظامیہ نے مارکیٹ میں صارف دوست ماحول مستقل بنیاد پر برقرار رکھنے کی حکمتِ عملی اپنا رکھی ہے۔ انہوں نے کہا کہ اشیائے ضروریہ کی زائد قیمت وصول کرنے والے دکانداروں کا سخت محاسبہ کیا جائے گا۔ ڈپٹی کمشنر نے واضح کیا کہ دکاندار خود ساختہ مہنگائی سے باز رہیں ورنہ رعایت نہیں کی جائے گی ۔