ٹی ایچ کیو ہسپتال کلر سیداں سے سات اہلکاروں کے تبادلے

کلر سیداں (نمائندہ جنگ)ٹی ایچ کیو ہسپتال کلر سیداں میں تعینات سرجن سمیت سات میڈیکل افسران اور نرسنگ سٹاف کے تبادلے کر دیئے گئے جس سے ہسپتال کی کارکردگی پر منفی اثرات مرتب ہونے کا خدشہ ہے۔ سرجن ڈاکٹر سلیم شہزاد گوندل، ٹی بی ڈاٹ کام انچارج ڈاکٹر محمد انور،ویمن میڈیکل آفیسر ڈاکٹر قمر النساء،ہیڈ نرس فرحت جبیں، چارج نرس زرین فاطمہ، نرس صباء شاہین اور کرن نواز کا تبادلہ ٹی ایچ کیو ہسپتال مری ہو جانے سے کلر سیداں کے عوامی حلقوں میں تشویش کی لہر دوڑ گئی ہے۔ادھر ہسپتال ذرائع نے بتایا کہ سرجن ڈاکٹر سلیم شہزاد کے تبادلے کے بعد آپریشن کا کام بھی ٹھپ ہو گیا ہے جبکہ ٹی بی انچارج ڈاکٹر محمد انور کی مری روانگی کے بعد ٹی بی کا کام بھی بری طرح متاثر ہو گا۔ ٹرانسفر ہونے والے افراد کے بعد ابھی تک کسی سرجن یا دیگر سٹاف کی تعیناتی عمل میں نہیں لائی گئی ۔