منشیات فروشوں‘ چوری ڈکیتی وارداتوں

کیخلاف اقدامات کرینگے‘ ڈی پی او جہلم پنڈ دادن خان (نامہ نگار) ضلع جہلم میں نئے تعینات ہونے والے ڈی پی او کیپٹن (ر) عامر خان نیازی نے اپنی پہلی کھلی کچہری پنڈ دادن خان میں منعقد کی۔ڈی پی او نے کہا کہ منشیات فروشوں کیخلاف بھرپور ایکشن پلان تیار کر رہے ہیں‘ چوری اور ڈکیتی کی وارداتوں کی روک تھام کیلئے موثر اقدامات کئے جائینگے۔ قانون کی حکمرانی اور اس پر عملدرآمد یقینی بنایا جائیگا۔ تحصیل پنڈ دادن خان ایک دور دراز اور پسماندہ ترین علاقہ ہے‘ یہاں کے لوگوں کو اپنے مسائل کے حل کیلئے دور دراز ڈسٹرکٹ ہیڈ کوارٹر جہلم جانا مشکل ہے۔ انہوں نے کہا کہ ہر ہفتے یا15دن بعد یہاں کھلی کچہری منعقد کی جائے گی تاکہ یہاں کے عوام کے مسائل انکی دہلیز پر ہی حل ہو سکیں۔ کھلی کچہری میں درجنوں خواتین و حضرات نے اپنے مسائل پیش کئے جس پر ڈی پی او نے متعلقہ افسران سے رپورٹ طلب کر لی۔ بعدازاں پولیس اسٹیشن پنڈ دادن خان میں وکلاء، صحافیوں، امن کمیٹی کے اراکین اور معززین علاقہ کے وفود سمیت مسلم لیگ (ن) کے ضلعی نائب صدر کرنل (ر) زاہد حسین شیرازی نے بعض اجتماعی مسائل کی طرف ڈی پی او کی نشاندہی کرائی جس پر انہوں نے یقین دہانی کرائی کہ ضلع بھر میں جلد تبدیلی نظر آئیگی اور بہت سے اجتماعی مسائل اگلی کھلی کچہری سے پہلے ہی حل ہو جائینگے۔