ناظم جوکھیو قتل کیس،پولیس کے جمع کروائے گئے چالان پر تاحال فیصلہ نہ ہوسکا

کراچی(اسٹاف رپوٹر/این این آئی)ناظم جوکھیوقتل کیس میں پولیس کی جانب سے عدالت میں جمع کروائے گئے چالان پر تاحال فیصلہ نہ ہوسکا۔ ہفتہ کو جوڈیشل مجسٹریٹ ملیرکراچی میں ناظم جوکھیو قتل سے متعلق کیس کی سماعت ہوئی۔پولیس کی جانب سے جمع کروائے گئے چالان پرتاحال فیصلہ نہ ہوسکا، عدالت نے آئندہ سماعت پرتمام فریقین سے دلائل طلب کرلیے۔عدالت نے ریمارکس دیئے کہ نیشنل کمیشن فار ہیومین رائٹس، وکیل مظہرجونیجو اور ملزمان کے وکلا دلائل دینگے۔ انسداد دہشت گردی کی عدالت نے کیس سے دہشت گردی کی دفعات ختم کردی تھیں۔پولیس نے کیس سے دہشت گردی کی دفعات ختم کرکے کیس کا چالان جوڈیشل مجسٹریٹ ملیر کی عدالت میں جمع کرادیا ہے۔ پولیس نے کیس میں سے پیپلز پارٹی کے رکن قومی اسمبلی جام عبدالکریم اور رکن سندھ اسمبلی جام اویس سمیت 13 ملزمان کے نام کیس سے خارج کرنے کی سفارش کررکھی ہے۔ناظم جوکھیو کے قتل کا مقدمہ میمن گوٹھ تھانے میں درج ہے۔جوڈیشل مجسٹریٹ ملیر نے کیس کی مزید سماعت 15 جون تک ملتوی کردی۔