دھانی کا ون ڈے ڈیبیو، شاہین اور حارث رؤف کو آرام دیا گیا

کراچی (اسٹاف رپورٹر) لاڑکانہ سے تعلق رکھنے والے نوجوان فاسٹ بولر شاہ نواز دھانی نے ٹی ٹوئنٹی کے بعد اتوار کو ملتان میں ون ڈے انٹر نیشنل ڈیبیو کیا۔ پاکستانی کرکٹ ٹیم نے شاہین شاہ آفریدی اور حارث رؤف کو آرام دے کر حسن علی اور شاہ نواز دھانی کو موقع دیا۔شاہ نواز کہتے ہیں کہ ون ڈے کھیلنا ہر کرکٹر کی طرح میرے خواب کی تعبیر ہے۔ میچ سے قبل شاہین شاہ آفریدی نے انہیں ون ڈے کیپ دی اور پوری پاکستانی ٹیم نے مبارک باد دی۔ دھانی پی ایس ایل میں ملتان سلطانز سے کھیلتے ہیں۔ شاہ نواز نے کہا کہ ٹی 20 کے بعد ون ڈے کھیل کربہت خوش ہوں۔ خواہش ہے کہ تینوں فارمیٹ میں پاکستان کی نمائندگی کروں، کوشش کروں گا کہ اچھی پرفارمنس دوں۔ نوجوانوں سے کہوں گا کہ محنت کریں کبھی مایوس نہ ہوں محنت کا صلہ ضرور ملتا ہے۔