قتل کا شبہ، عدالت کا عامر لیاقت کی قبر کشائی اور پوسٹ مارٹم کرانے کا حکم

کراچی(جنگ نیوز)کراچی کی عدالت نے سابق رکن قومی اسمبلی ڈاکٹر عامر لیاقت کے پوسٹمارٹم کا حکم دے دیا۔سٹی کورٹ میں عامرلیاقت کا پوسٹمارٹم کرانے سے متعلق درخواست کی سماعت ہوئی۔ عدالت نے عامرلیاقت کا پوسٹ مارٹم کرانے سے متعلق درخواست منظورکرتے ہوئے پوسٹ مارٹم کرانے کا حکم دے دیا۔عدالت میں عامر لیاقت کے ورثا اورسرکاری وکیل پیش ہوئے۔ سرکاری وکیل نے موقف اختیار کیا کہ عامر لیاقت کے ورثا کا کہنا ہے کہ پوسٹمارٹم کرانے سے ان کے والد کی روح کو تکلیف ہوگی اس لئے وہ پوسٹمارٹم نہیں کرانا چاہتے، ورثا کے مطابق انہیں کسی پرشک بھی نہیں۔عدالت میں پیش کی گئی پولیس رپورٹ کے مطابق پولیس سرجن کا کہنا ہے کہ جب تک جسم کا اندرونی جائزہ نہیں لیا جائے گا موت کی وجوہات معلوم نہیں ہوسکیں گی۔کراچی میں جوڈیشل مجسٹریٹ کی عدالت میں شہری عبدالاحد نے عامر لیاقت حسین کے پوسٹ مارٹم سے متعلق درخواست دی تھی۔