سیکرٹری پنجاب اسمبلی محمد خان اور سیکرٹری پارلیمانی امور عنایت اللہ لک تفتیش کیلئے تھانہ شاہدرہ میں پیش ہو گئے

لاہور(پ ر) سیکرٹری پنجاب اسمبلی محمد خان اور سیکرٹری پارلیمانی امور عنایت اللہ لک اپنی لیگل ٹیم کے ہمراہ تھانہ شاہدرہ میں تفتیش کیلئے پیش ہوئے۔ سابق صوبائی وزیر میاں اسلم اقبال بھی ان کے ہمراہ تھے۔ سیکرٹری اسمبلی اور سیکرٹری پارلیمانی امور کے خلاف ایم پی اے پیر محمد اشرف رسول نے سیاسی بنیادوں پر مقدمہ درج کروا رکھا ہے۔ اسمبلی افسران نے انچارج انویسٹی گیشن قیوم نذر چٹھہ کو اپنا بیان قلمبند کروایا۔ بعد ازاں میڈیا سے گفتگو کرتے ہوئے محمد خان بھٹی نے کہا کہ عدالت کے حکم پر آج تھانہ شاہدرہ میں پیش ہوئے ہیں، ضمانت کروانے کے بعد شامل تفتیش ہونے آئے ہیں، ہمارے خلاف جھوٹی ایف آئی آر درج کروا کے سیاسی انتقامی کاروائیوں کا نشانہ بنایا جا رہا ہے۔ گھبرانے والے نہیں پہلے بھی سیاسی انتقام کا سامنا کیا اب بھی کریں گے۔