فیاض چوہان کا عمران خان کے قتل کی سپاری دیئے جانے کا دعویٰ

اسلام آباد (جنگ رپورٹر) عمران خان کے میڈیا ایڈوائزر ،فیاض الحسن چوہان نے دعویٰ کیا ہے کہ افغانستان میں موجود کوچی نامی دہشت گرد کو عمران خان کو قتل کرنے کی سپاری دی گئی ہے، ہفتہ کے روز فیاض الحسن چوہان کی جانب سے کئے گئے ٹوئٹ میں ان کا کہنا تھا اطلاع ہے کہ کچھ لوگوں نے افغانستان میں موجود کوچی نامی دہشت گرد کو ، عمران خان کو قتل کرنے کی سپاری دی ہے، انہوں نے ایف اے ٹی ایف کے حوالے سے حنا ربانی کھر کی پریس کانفرنس پر رد عمل دیتے ہوئے کہا کہ ان کے منہ سے گرے لسٹ سے نکلنے کی فضیلتیں اور فوائد سن کر بہت اچھا لگاہے ،چند ماہ پہلے یہی حنا ربانی کھر گرے لسٹ کے حوالے سے قانون سازی کے خلاف بیان اور احتجاج کر رہی تھیں،عوام قومی اسمبلی میں منی لانڈرنگ کے خلاف قانون سازی کے خلاف ان کا احتجاج نہیں بھول سکتے ہیں اورآج یہ گرے لسٹ سے نکلنے کا اعزاز اپنے سینے پر سجانے کو بے تاب ہیں،انہوںنے مزید کہاکہ آج کا لطیفہ یہ ہے کہ منی لانڈرنگ میں پی ایچ ڈی کرنے والے آج عوام کوگرے لسٹ سے نکلنے کے فوائد بتا رہے ہیں۔