تحریک آزاد ی زور و شور سے جاری رہے گی ، حریت کانفرنس

21 جون ، 2022

اسلام آباد(این این آئی)کل جماعتی حریت کانفرنس کی آزادجموںوکشمیر شاخ نے شہید قاضی نثار احمدکو ان کی 28ویں برسی پر خراج عقیدت پیش کرنے کیلئے اسلام آباد میں ایک دعائیہ مجلس کا انعقادکیا۔ کشمیرمیڈیا سروس کے مطابق اجلاس کی صدارت کل جماعتی حریت کانفرنس کی آزادجموںوکشمیر شاخ کے کنونیر محمود احمد ساغرنے کی ۔ تقریب میں شہدا ء کے بلند درجات کے لیے دعا کی گی ۔ کنوینر محمود احمد ساگر نے تقریب سے خطاب کرتے ہوئے کہا کہ کشمیری عوام ڈاکٹر قاضی نثار احمد کی مذہبی اورسیاسی خدمات کو کبھی فراموش نہیں کریں گے۔ انہوں نے قاضی نثار احمد کے لیے جنت الفردوس میں اعلیٰ درجات کی دعا کی۔انہوں نے کہاکہ تحریک آزادی کے دوران معاشرے کے تمام طبقات سے تعلق رکھنے والے لوگوں نے اپنی قیمتی جانوں کا نذرانہ پیش کیا ہے جسے رائیگاں نہیں جانے دیا جائے گا۔ اس موقع پر شہدائے کشمیر کیلئے خصوصی دعا کی گئی ۔دریں اثناء حریت رہنمائوں محمد عمیر اور عبدالمجید لون نے بھی ڈاکٹر قاضی نثار احمد کو ان کی 28ویں برسی پرشاندار خراج عقیدت پیش کیاہے۔