بھارت میں گستاخانہ بیانات کیخلاف شکاگو میں مسلمان تنظیموں کا احتجاج

شکاگو(این این آئی)بھارت کی حکمران جماعت بی جے پی کے رہنمائوں کی طرف سے پیغمبر اسلام حضرت محمد ؐکے بارے میں گستاخانہ بیانات کے خلاف امریکہ کے شہر شکاگو میں مسلمان تنظیموں نے بھارتی قونصل خانے کے سامنے احتجاجی مظاہرہ کیا۔کشمیر میڈیا سروس کے مطابق مظاہرین نے بھارت میں اسلام اور مسلمانوں پر حملوں میں ملوث افراد کے خلاف سخت کارروائی کا مطالبہ کیا۔ احتجاج میں سینکڑوں غیر مسلموں نے بھی شرکت کی اور بھارت میں مظلوم مسلمانوں کے ساتھ اظہار یکجہتی کیا۔ شرکاء نے نعرے بھی لگائے ۔ مظاہرین سے خطاب کرتے ہوئے ڈاکٹر قطب الدین نے کہا کہ مسلمان سب کچھ برداشت کر سکتے ہیں لیکن وہ اپنے نبی پاک ؐ کی کسی قسم کی توہین برداشت نہیں کر سکتے۔