عوام نے عمران خان کی انتشار کی کال پھر مسترد کر دی، شیری رحمٰن

اسلام آباد (این این آئی) وفاقی وزیر اور نائب صدر پیپلز پارٹی سینیٹر شیری رحمٰن نے سابق وزیر اعظم عمران خان کے احتجاج پر ردعمل کا اظہار کرتے ہوئے کہا ہے کہ لوگوں نے عمران خان کی انتشار کی کال کو ایک بار پھر مسترد کر دیا۔ اپنے بیان میں سینیٹر شیری رحمن نے کہاکہ لوگوں کی کم تعداد دیکھ کر عمران خان احتجاج کی کال واپس لے لیتے ہیں، جب لوگوں نے ʼʼعالمی سازشʼʼکے بیانئے کو مسترد کیا تو ان کو مہنگائی یاد آ گئی، جس مہنگائی کے خلاف عمران خان احتجاج کر رہے اس کے ذمہ دار بھی وہ خود ہیں۔ انہوں نے کہاکہ ملک کی معیشت کو تباہ کرنے کے بعد یہ نجات دہندہ بننے کی کوشش کر رہے۔ انہوںنے کہاکہ مہنگائی کے خلاف احتجاج کرنے والا عمران خان حکومت میں کہتا تھا وہ آلو ٹماٹر کی قیمتیں ٹھیک کرنے نہیں آیا۔ انہوں نے کہاکہ لوگوں کو اب پی ٹی آئی کے بیانیے اور انتشار کی سیاست میں کوئی دلچسپی نہیں رہی۔