حوصلے بلند ،ڈرنے والے نہیں، حکومت مزید مقدمات بنا لے،پی ٹی آئی

لاھور ( نمائندہ جنگ )پاکستان تحریک انصاف کے رہنماؤں کا کہنا ہے کہ حوصلے بلند، ڈرنے والے نہیں، حکومت مزید مقدمات بنا لے،سینٹرل پنجاب کی صدر ڈاکٹر یاسمین راشد نے انسداد دہشت گردی عدالت کے باہر میڈیا سے گفتگو کرتے ھوئے کہاکہ پانچویں بار انسداد دہشت گردی عدالت میں ہماری پیشی ہے۔ شفیق آباد کی حدود میں میری گاڑی کو توڑا گیا ۔ ن لیگ کے گلو بٹوں نے میری گاڑی توڑی۔ الٹا میرے اوپر انسداد دہشت گردی کی دفعات لگا دی گئی ہیں۔ ادھر تحریک انصاف کے رہنما میاں اسلم اقبال نے میڈیا سے گفتگو کرتے ہوئے کہاکہ قیادت پر پرچے کرنے کا مقصد مختلف ایشوز سے نظر ہٹانا ہے۔ یہ اسمبلی میں نیب کے خلاف بل پاس کروانا چاہتے ہیں۔ مہنگائی کے خلاف ساری عوام نکلی۔جتنے مقدمات چاہتے ہیں ہم پر بنا لیں۔ یہ باپ بیٹا جعلی ہیں۔ تحریک انصاف سینٹرل پنجاب کے جنرل سیکرٹری حماد اظہرنے انسداد دہشت گردی عدالت کے باہر میڈیا سے گفتگو کرتے ہوئے کہاکہ یہ ملک کو پولیس اسٹیٹ بنانا چاہتے ہیں۔ ملک میں مہنگائی بہت زیادہ ہوچکی ہے عوام کی کسی کو فکر نہیں۔ ڈالر ملکی تاریخ میں بلند ترین سطح پر پہچ چکا ہے۔ ہمارے حوصلے بلند ہیں۔ ڈرنے والے نہیں مزید مقدمات قائم کرلو۔