فیرئر ہال میں نئی تعمیرات پر ایڈمنسٹریٹر کو ہائیکورٹ کا شوکاز نوٹس

کراچی ( اسٹاف رپورٹر ) سندھ ہائی کورٹ نے فیرئر ہال کے داخلی راستے میں تزئین و آرائش کے نام پر تعمیرات کے خلاف برہمی کا اظہار کرتے ہوئے ایڈمنسٹریٹر کے ایم سی بیرسٹر مرتضیٰ وہاب کو شوکاز نوٹس جاری کردیا، پیر کو کورٹ میں آثار قدیمہ قرار دی گئی عمارتوں اور فرئیر ہال کے داخلی راستے پر نئی تعمیرات کے خلاف ماروی مظہر کی درخواست پر سماعت ہوئی، عدالت نے فیرئر ہال سمیت دیگر آثار قدیمہ میں شامل عمارتوں میں نئی تعمیرات پر برہمی کا اظہار کیا۔ عدالت نے ایڈمنسٹریٹر کے ایم سی مرتضیٰ وہاب کو شوکاز نوٹس جاری کرتے ہوئے فیرئر ہال کی حدود میں نئی تعمیرات پر مرتضیٰ وہاب سے وضاحت طلب اور شہر میں قدیم عمارتوں میں مداخلت سے روکتے ہوئے فیرئر ہال میں تعمیر ہونے والے گیٹ فوری توڑنے کا حکم دیتے ہوئے رپورٹ طلب کرلی، عدالت نے ریمارکس دیئے کہ آثار قدیمہ اور ثقافتی ورثے کو نقصان پہنچانا ناقابل برداشت ہے، آثار قدیمہ قرار دی گئی عمارت میں نئی تعمیرات کے خلاف ماروی مظہر نے سول سوٹ دائر کیا تھا، جس میں موقف اپنایا گیا تھا کہ قانون کے مطابق آثار قدیمہ قرار دی گئی عمارتوں میں نئی تعمیرات نہیں کی جاسکتیں۔