مالیاتی شعبے میں اصلاحات معیشت کو مستحکم کرنے کے ہدف کا حصہ ، بلاول بھٹو

اسلام آباد (نامہ نگار خصوصی) وزیر خارجہ بلاول بھٹو زرداری نے کہا ہے کہ پاکستان اپنے مالیاتی شعبے میں اصلاحات کا مثبت عمل جاری رکھنے کیلئے پرعزم ہے جو قومی معیشت کو مستحکم کرنے کے وسیع تذویراتی ہدف کا حصہ ہے،ایک بیان میں انہوں نے پاکستان کے اس پختہ عزم کا اعادہ کیا کہ رقوم کی غیرقانونی منتقلی اور دہشتگردی کیلئے مالی معاونت کی رو ک تھا م سے متعلق اقدامات کو عالمی معیار کے مطابق بنانے کا عمل جاری رہے گا،انہوں نے فنانشل ایکشن ٹاسک فورس کی جانب سے پاکستان کے دورہ کے اعلان کو خوش آئند پیشرفت قرار دیااور کہاکہ ہم اس دورے اور پاکستان کے کامیابی کیساتھ گرے لسٹ سے نکلنے کے عمل اوراسکی جلد تکمیل کے خواہشمند ہیں،وزیر خارجہ نے اعتمادظاہر کیا کہ ایف اے ٹی ایف کی اچھی خبر سے پاکستان کی معیشت پر بیرونی سرمایہ کاروں کا اعتماد بحال ہوگا اور پائیدار ترقی کا عمل تیز ہوگا۔