مقبوضہ بیت المقدس ، یہودی آباد کار نے فلسطینی کو چاقو کا وار کرکے شہید کر دیا

مقبوضہ بیت المقدس (این این آئی)مقبوضہ مغربی کنارے میں یہودی آباد کار نے ایک فلسطینی کو چاقو کا وار کرکے شہید کر دیا۔میڈیارپورٹس کے مطابق فلسطینی وزارت صحت اور ایک عینی شاہد نے بتایاکہ28سالہ فلسطینی نوجوان کو ایک یہودی آباد کار نے سینے پر چاقو مار کر شہید کردیا۔ نوجوان کی شناخت علی حسن حرب کے نام سے ہوئی ہے۔اسرائیلی بستی کے قریب واقع گائو ں اسکاکا سے تعلق رکھنے والے ایک فلسطینی باشندے نے واقعے کی تفصیلات سے آگاہ کرتے ہوئے بتایا کہ ہم نے سنا کہ آباد کار ہماری زمین پر آگئے ہیں، یہ سنتے ہی میں، علی اور تین دیگر افراد وہاں گئے۔ ہم نے انہیں فورا باہر نکال دیا لیکن جب پولیس اور فوج جائے وقوعہ پر پہنچی تو وہ واپس آگئے اور ہم پر حملہ کردیا ۔اس دوران چاقوکے وار سے علی شہید ہوگیا۔دوسری جانب فلسطینی وزارت خارجہ نے علی کے قتل کی شدید مذمت کی ۔