آئی ایم ایف کے بیل آؤٹ پیکیج میں ایک سال توسیع کی امید ہے، مفتاح اسمٰعیل

اسلام آباد ( این این آئی ) وزیر خزانہ مفتاح اسمٰعیل نے کہا ہے کہ آئی ایم ایف کے بیل آؤٹ پیکیج میں ایک سال کی توسیع کی امید ہے، قرض کی رقم بڑھنے کی توقع ہے ، کسی رکاوٹ کا خدشہ نہیں، آئی ایم ایف سے بنیادی طورپربجٹ اور مالیاتی اقدامات پراتفاق ہوا ۔ادھر باخبر ذرائع کے مطابق اگلے بجٹ میں ٹیکس وصولیوں کا ہدف7 ہزار450ارب جب کہ پیٹرولیم مصنوعات پر ہرماہ 5 روپے فی لیٹر لیوی پر اتفاق ہوا ہے۔غیر ملکی میڈیا سے گفتگو میں انہوں نے کہا کہ آئی ایم ایف سے بیل آؤٹ پیکج میں ایک سال کی توسیع متوقع ہے، آئی ایم ایف سے قرض کی رقم بڑھنے کی بھی توقع ہے جب کہ کسی رکاوٹ کا خدشہ نہیں، آئی ایم ایف سے بنیادی طورپربجٹ اور مالیاتی اقدامات پراتفاق ہوا ہے۔ دوسری جانب ذرائع نے کہا ہےکہ اگلے بجٹ میں ٹیکس وصولیوں کا ہدف 7ہزار 5ارب روپے سے بڑھا کر7ہزار450ارب روپے کرنے پر اتفاق ہوا ہے جب کہ کسٹم وصولی کا ہدف 950 ارب روپے سے بڑھا کر ایک ہزار 5 ارب روپے کرنے پر اتفاق ہوا ہے۔ذرائع کے مطابق پیٹرولیم مصنوعات پر ہرماہ 5 روپے فی لیٹر لیوی عائد کرنے، جی ایس ٹی کی مد میں وصولیوں کا ہدف 3 ہزار8 ارب روپے سے بڑھا کر 3 ہزار 3 سو ارب روپے کرنے پر اتفاق ہوا ہے، انکم ٹیکس کی مد میں وصولیوں کا ہدف 55 ارب روپے بڑھانے پر اتفاق کیا گیا جب کہ آئی ایم ایف کا مطالبہ ہے کہ پیٹرولیم مصنوعات پر یکم جولائی سے سیلز ٹیکس 11 فیصد کی شرح سے وصول کیا جائے۔ آئی ایم ایف نے پیٹرولیم مصنوعات پر50 روپے فی لیٹرلیوی عائد کرنے کا مطالبہ کررکھا ہے جس کےبعد پیٹرولیم مصنوعات پر ہرماہ 5 روپے فی لیٹر لیوی عائد کرنے پر اتفاق ہوا ہے۔