عمران خان نے سیاسی مخالفین گرفتارکرانے کیلئے نیب کو استعمال کیا،احسن اقبال

اسلام آباد (اے پی پی) وفاقی وزیرمنصوبہ ، ترقی ، اصلاحات و خصوصی اقدامات احسن اقبال نے کہا ہے کہ عمران خان نے سیاسی مخالفین کو گرفتارکرانے کیلئے نیب کو استعمال کیا،وہ نیب قوانین میں ترمیم کر کے خود کو اوراپنی کابینہ کو این آراودے کر گئے، عمران خان کے دورحکومت میں کرپشن انڈیکس بلندیوں پر پہنچا،کرپشن پر لیکچر دینے والوں کے دور میں مافیاز کو فری ہینڈ دیا گیا، عمران خان کی ناکام سیاست کا باب ختم ہوچکا، موجودہ حکومت احتساب پر یقین رکھتی ہے،کرپشن کا خاتمہ کریں گے۔ ان خیالات کا اظہار انہوں نے گذشتہ روز میڈیا بریفنگ میں کیا۔ انہوں نے کہا کہ عمران خان سیاسی حریفوں کو بغیر ثبوت جیلوں میں دیکھنا چاہتے ہیں،عمران خان نے سوشل میڈیا ٹرینڈزبناکراپنی حکومت چلائی، سی پیک منصوبوں کو تباہ کیا، سیاست اور اخلاقیات کا بیڑہ غرق کردیا، موجودہ حکومت احتساب پر یقین رکھتی ہے،کرپشن کا خاتمہ کریں گے ، عمران خان کی ناکام سیاست کا باب ختم ہوچکا ۔ انہوں نے کہا کہ عمران نیازی جھوٹ پر جھوٹ بول رہے ہیں کہ حکومت نیب قوانین میں ترمیم کرکے چوروں کو بچا رہی ہے اگر وہ اپنی تقریریں سن لیتے تو ان کو پتہ ہوتا کہ انہوں نے کئی مرتبہ کہا کہ نیب قوانین میں ترامیم کی جائیں کیونکہ سرمایہ کار پاکستان کا رخ نہیں کرتے۔ انہوں نے کہا کہ میں ان کو چیلنج دیتا ہوں کہ ن لیگ کے دور میں ہم نے 3200 ارب کے منصوبے مکمل کئے ان میں 32 پیسے کی کرپشن ثابت کردیں تو ہم قومی مجرم ہیں۔ انہوں نے کہا کہ پی ٹی آئی کی حکومت نے دوست ممالک کے ساتھ تعلقات خراب کئے ان تعلقات کو ہم اب دوبارہ بحال کر رہے ہیں ، پاکستان کی 75 سالہ تاریخ میں یہ پہلی مرتبہ ہوا کہ ترقیاتی کاموں کے لئے ریلیف زیرو ہوا ، موجودہ حکومت اس ملک کو دلدل سے نکال لائے گی۔ انہوں نے کہا کہ سب کا احتساب ہوگا لیکن احتساب کسی بھی طرح سیاسی مقاصد کے لئے استعمال نہیں ہوگا۔