پنجاب میں جعلی حکمرانوں کو عوام کی حمایت حاصل نہیں، پرویزالٰہی

لاہور(نمائندہ جنگ)سپیکر پنجاب اسمبلی چوہدری پرویزالٰہی نے کہا کہ پنجاب میں دو نمبر حکومت قائم ہے، جعلی حکمرانوں کو عوام کی حمایت حاصل نہیں، روز بروز بڑھتی ہوئی مہنگائی اور پٹرول کی قیمتوں میں اضافے سے عام آدمی کا جینا مشکل ہو گیا ، جعلی حکمرانوں نے ملکی معیشت کو تباہ کر دیا ، آئی ایم ایف کی تمام شرائط کے ساتھ یکطرفہ معاہدے یہ خود کر رہے ہیں جبکہ نام عمران خان کا لگا رہے ہیں۔ ان سے صدر پاکستان مسلم لیگ ضلع خوشاب اور ٹکٹ ہولڈر چوہدری رضوان مختار رندھاوا نے وفد کے ہمراہ ان سے ملاقات کی۔ چوہدری پرویزالٰہی نے ضمنی الیکشن کے حوالے سے پنجاب بھر کے تمام اضلاع کے پارٹی عہدیداروں اور کارکنوں کو ہدایات جاری کرتے ہوئے کہا کہ ضمنی الیکشن میں ہم تحریک انصاف کی بھرپور سپورٹ کریں گے، تحریک انصاف کے امیدواروں کے ساتھ مل کر ان کی الیکشن مہم چلائی جائے، ڈور ٹو ڈور رابطہ عوام مہم شروع کی جائے، کارنر میٹنگ اور جلسوں کا انعقاد کیا جائے۔