خواتین مردوں کے شانہ بشانہ کام کی صلاحیت رکھتی ہیں،ارشاد ادریس

مظفرآباد ( جنگ نیوز)ممبر وویمن کمیشن آزاد حکومت ریاست جموں وکشمیر ارشاد ادریس نے کہا ہے کہ خواتین کو عزت بھی دیں اور ان کی عزت بھی کریں خواتین پاکستان و آزادکشمیر کی ترقی کے لئے محنت اور لگن سے فرائض سرانجام دے رہی ہیں۔ ان خیالات کا اظہار انھوں نے خواتین کے وفد سے گفتگو کرتے ہوئے کیا۔ انھوں نے کہا کہ عورتیں ہر میدان میں مردوں کے شانہ بشانہ کام کرنے کی صلاحیت رکھتی ہیں۔خواتین معاشرے کا اہم حصہ ہیں۔اور وہ معاشرے کی فلاح وبہبود میں بڑھ چڑھ کر حصہ لے رہی ہیں۔عورت کو مضبوط کرنا ہے تو اس کی جسمانی حالت، اس کی قانونی حیثیت، معاشرے میں اس کے مقام کو اور قانون کے اعتبار سے اس کی وراثت کو مضبوط بنانا ہے جس کی جانب ہماری توجہ نہیں ہے۔تاریخ میں عالمی وباؤں کے دوران خواتین نے ہمیشہ ایک نمایاں کردار ادا کیا۔اگر ایک عورت کچھ کرنے کا تہیہ کر لے تو وہ کر کے رہتی ہے۔اللہ پاک نے عورت کو بڑی عزتوں سے نوازا ہے۔ عورت ماں کے روپ میں بچوں کی بہترین تربیت کرتی ہے ہم کسی بھی صورت معاشرے کے اندر عورت کے کردار کو فراموش نہیں کرسکتے۔