اقوام متحدہ یٰسین ملک کے معاملے پر انکوائری کمیشن بنائے ، مشعال ملک

اسلام آباد (صباح نیوز) یٰسین ملک کی اہلیہ مشال ملک نے کہا ہے کہ یٰسین ملک نے پرامن تحریک چلائی مگر انہیں بولنے کا حق نہیں دیا گیا ۔ بھارتی عدلیہ کسی کشمیری کو حقوق نہیں دیتی۔ اقوام متحدہ یٰسین ملک کے معاملے پر انکوائری کمیشن بنائے ۔ اسلام آباد ہائی کورٹ بار ایسوسی ایشن کی طرف سے منعقدہ تقریب سے خطاب کرتے ہوئے انہوں نے کہا کہ بھارتی حکومت کی جانب سے جاری پرامن تحریک کے رہنما کو دہشتگرد قرار دیا گیا، کسی زمانے میں نیلسن منڈیلا کو دہشت گرد قرار دیا گیا مگر بعد میں نوبیل انعام سے نوازا گیا۔ یٰسین ملک کو بولنے کی اجازت نہیں دی گئی اور آن لائن سزا سنائی گئی ، یٰسین ملک کا فیصلہ آنے سے پہلے میڈیا ٹرائل شروع کیا گیا۔ دہشت گردوں کی معاونت، قتل عام جیسے بے وقوفانہ الزامات لگائے گئے ۔ بھارتی حکومت نے انہیں بنیادی حقوق سے بھی محروم رکھا ۔ بھارت نے ہمیشہ کشمیری رہنماؤں کا عدالتی قتل کیا ، یاسین ملک کو سزا کے بعد کشمیری نوجوانوں کا قتل عام کیا گیا ،بھارت اقوام متحدہ اور جنیوا کنونشن کے قوانین کی خلاف ورزی کررہا ہے ۔