ساحل وسائل پر دسترس اور قومی حقوق کے لیے جدوجہد جاری ہے،بی این پی

کوئٹہ(آن لائن)بلوچستان نیشنل پارٹی کی سینٹرل ایگزیکٹو کمیٹی کے ممبر وضلعی صدر بی این پی کوئٹہ غلام نبی مری نے ایک بیان میں لورالائی میونسپل کمیٹی کے آزاد ممبر معروف سیاسی وقبائلی رہنماء حاجی محمد ہاشم خان اتمانخیل کو بلوچستان نیشنل پارٹی میں شمولیت کرنے پر مبارکباد پیش کرتے ہوئے کہاہے کہ ان کی بی این پی میں شمولیت کا فیصلہ خوش آئند ہے موجودہ گھمبیر حالات میں بی این پی واحد سیاسی جماعت ہے جو بلا رنگ ونسل اور زبان کے مظلوم ومحکوم اقوام کی آواز بن کر بلوچستان اور یہاں کے عوام کے ساحل وسائل پر ان کی دسترس کیلئے ایک وسیع تحریک چلارہی ہے اس تحریک میں پارٹی کے کارکنوں سے لے کر عہدیداروں تک سب نے جانوں کے نذرانے پیش کیے ہیں۔ آج بھی راہشون سردار عطاء اللہ مینگل کے نظریے سردار اختر جان مینگل کی قیادت میں بلوچ پشتون حقوق کے علمبرداربلوچستان نیشنل پارٹی بھرپور جذبے کے ساتھ تحریک آگے بڑھارہی ہے بلوچستان میں نیشنل عوامی پارٹی (نیپ) کے بعد بی این پی واحدسیاسی قومی جماعت ہے جس نے صوبے کی بلوچ پشتون ہزارہ اور دیگر آباد اقوام کی مکمل نمائندگی کی ہے اور انہیں درپیش مسائل ومشکلات کو بھرپور جذبے کے ساتھ حل کرنے کیلئے آگے بڑی ہے ضرورت اس امر کی ہے عوام اس قومی تحریک کو مضبوط بنانے کیلئے آگے بڑھیں۔