سندھ ہائیکورٹ، عامر لیاقت کی قبر کشائی روک دی

کراچی( نمائندہ جنگ ) سندھ ہائی کورٹ نے جوڈیشل مجسٹریٹ شرقی کا 18 جون کا فیصلہ معطل کرتے ہوئے مرحوم ڈاکٹر عامر لیاقت عدالت کی قبر کشائی سے روک دیا ہے ، عدالت عالیہ نے ایڈووکیٹ جنرل سندھ، پراسکیوٹر جنرل سندھ اور شہری عبد الاحد کو نوٹس جاری کرتے ہوئے 29 جون تک جواب طلب کر لیا ہے۔ عدالت نے سیکریٹری صحت، میڈیکل بورڈ، ایس ایس پی ایسٹ، ایس ایچ او بریگیڈ سے بھی جواب طلب کرلیا۔ تحریری حکم نامے کے مطابق درخواست گزار نے جوڈیشل مجسٹریٹ شرقی کے 18 جون کا فیصلے کے خلاف درخواست دائر کی۔ تحریری حکم نامے میں کہا گیا کہ درخو است گزار نے کہا کہ جوڈیشل مجسٹریٹ شرقی نے عبد الاحد کی عامر لیاقت کے پوسٹ مارٹم کرنے درخواست منظور کی تھی۔ درخواست ایک اجنبی کی جانب سے دائر کی گئی تھی جو ناقابل سماعت ہے۔ جوڈیشل مجسٹریٹ نے ہمارا موقف پوری ٹھیک طرح سے نہیں سنا۔جوڈیشل مجسٹریٹ کا 18 جون کا حکم معطل کیا جائے۔