غلط رن وے پر لینڈنگ، کرغزستان سے لاہور آنیوالی پرواز حادثے سے بال بال بچ گئی

لاہور(جنگ نیوز) کرغزستان سے لاہور آنیوالی ائیر بس اے 320طیارے کے غیر ملکی کپتان نے غلط رن وے پر لینڈنگ کی کوشش کی جس پر کنٹرول ٹاور نے ہاٹ لائن پر کپتان کو غلطی سے آگاہ کیا اور پرواز 4541 کو فضا میں گھوم کر دوبارہ لینڈنگ کی ہدایت کی۔ائیرپورٹ ذرائع کے مطابق غیر ملکی کپتان نے رن وے 18 ایل پر لینڈنگ کی کوشش کی تھی جو 2سال سے زیر تعمیر اور تمام پروازوں کیلئے بند ہے جب کہ 5 منٹ بعد کپتان نے دوسری کوشش میں جہاز کو سیکنڈری رن وے 36 ایل پر لینڈ کرایا۔