اسلامی عبادات کا مقصد شکرِ الٰہی کے جذبات پروان چڑھانا ہے،عبدالمجید ندیم

برمنگھم (پ ر) اسلامی عبادات کا مقصد شکرِ الٰہی کے جذبا ت و احساسات کو پروان چڑھانا ہے،جو افراد اللہ تعالیٰ کی نعمتوں پر شکر ادا کرتے ہیں وہ قربِ الٰہی کی منزلیں طے کرتے ہوئے بندگی کی معراج تک پہنچ جا تے ہیں۔ ناشکرے افراد اللہ تعالیٰ کی نعمتوں سے محرومی کے ساتھ ساتھ سکون و اطمینان کی دولت سے بھی دُور کر دیئے جا تے ہیں۔ ان خیالات کا اظہار تحریکِ کشمیر بر طانیہ کے جنرل سیکرٹری مفتی عبدالمجید ندیم نے ہینڈز ورتھ اسلامک سنٹر میں خصوصی اجتما ع سے خطا ب کرتے ہو ئے کیا۔ انہوں نے کہا ’’آج مسلمانوں کا معاشرہ اور اس کے افراد سب کچھ ہو نے کے باوجود بھی اللہ تعالیٰ کا شکر ادا کرنے سے محروم ہیں، جس کا نتیجہ یہ ہے کہ ہم نفسانفسی اور مفاد پرستی کا شکا ر ہو چکے ہیں۔ ماضی میں افراد کے پاس اگرچہ وسائل کم تھے اور سہولتیں نہ ہو نے کے برابر تھیں لیکن اس سب کے باوجود لوگوں کی زبا نوں پر شکرِ الٰہی کے کلمات جاری و ساری رہتے تھے۔ انہوں نے شکوہ و شکایت کی بجائے قناعت اور توکل کو اپنی زندگی کی عادتِ ثانیہ بنایا ہواتھا، یہی وجہ تھی کہ پورے معاشرے میں باہمی تعاون و تنا صر کی فضا قائم تھی۔ اس کے برعکس آج کے انسان کے پاس سب کچھ موجود ہے لیکن پھر بھی شکوہ و شکایت اس کی شخصیت کا لا زمی حصہ بنتا جا رہا ہے۔ اس منفی رجحان نے بحیثیت مجموعی اس کی شخصیت کو مسخ کر دیا ہے۔ مفتی عبدا لمجید ندیم نے مزید کہا کہ ’’وقت آ گیا ہے کہ ہم اپنے قرب و جوار میں شکرِ الٰہی کی فضا کو عملی طور پر قائم کرنے کے لیے جدوجہد کریں۔ اس کے لیے اپنی نسلوں کو دینی تعلیمات سے روشناس کرانے کے ساتھ ساتھ ایسے اقدامات کریں جو ہمیں اپنے سے کم وسائل افراد سے جوڑ سکیں اور ان کی خدمت کے قابل بنا سکیں۔