وزیر اعلیٰ حمزہ سے سعودی صنعتکاروں کی ملاقات،پنجاب میں سرمایہ کاری کا اعلان

لاہور(خصوصی نمائندہ) وزیراعلیٰ پنجاب حمزہ شہباز شریف سے فیڈریشن آف سعودی چیمبرز کے تجارتی وفد نے فہد الباش کی قیادت میں ملاقات کی۔ وفد میں سعودی سرمایہ کار اور کاروباری شخصیات شامل تھیں۔ سعودی وفد نے پنجاب میں زراعت، سوشل سیکٹر، لائیو سٹاک اور دیگر شعبوں میں سرمایہ کاری کا اعلان کردیا ۔ وزیراعلیٰ نے کہا کہ پنجاب میں سرمایہ کاری کیلئے سازگار ماحول ہے اور وقت آگیا ہے کہ دیرینہ برادرانہ تعلقات کو پائیدار معاشی شراکت داری میں بدلیں۔چولستان میں صحرا کی ہزاروں ایکڑ اراضی کو جدید ٹیکنالوجی کی مدد سے نخلستان میں تبدیل کیا جا سکتا ہے۔اکنامک پارنٹر شپ کے فروغ سے دونوں ملکوں کے عوام کو فائدہ پہنچے گا۔ سعودی عرب کے سرمایہ کاروں کو ہر ممکن سہولتیں فراہم کریں گے۔ سعودی وفد کے سربراہ فہد الباش نے کہا کہ پنجاب میں سرمایہ کاری میں گہری دلچسپی کا اظہار کرتے ہوئے کہا کہ ہم زراعت، لائیو سٹاک اور دیگر شعبوں میں سرمایہ کاری کے مواقع سے استفادہ کرنا چاہتے ہیں۔ صوبائی پارلیمانی پارٹی اجلاس سے خطاب کرتے ہوئے وزیراعلیٰ نے کہا کہ بجٹ میں عام آدمی کو ریلیف دینے پر پورا فوکس کیا گیا ہے۔ہم نے عوام کی امیدوں پر پورا اترنا ہے۔ مل کر کام جاری رکھیں گے۔اجلاس میں نئے مالی سال 2022-23 کے بجٹ کی منظوری کے حوالے سے حکمت عملی طے کی گئی- وزیر اعلینے افغانستان میں زلزلے کے باعث جانی نقصان پر گہرے دکھ اور افسوس کا اظہا ر کیا۔