اگرعسکری ادارہ نہ چاہتا تو ہماری حکومت نہ گرتی،فواد چوہدری

کراچی(ٹی وی رپورٹ) پی ٹی آئی رہنما فواد چوہدری نے ایک انٹرویو میں گفتگو کرتے ہوئے کہا ہے کہ اگرعسکری ادارہ نہ چاہتا تو ہماری
حکومت نہ گرتی،پاکستان کی سیاست میں اسٹیبلشمنٹ پلیئر ہے وہ کیسے نیوٹرل ہوسکتا ہے؟،فوج اور عدلیہ پاکستانی سیاست میں اے پولیٹیکل نہیں بلکہ پولیٹیکل پلیئر ہیں، پاکستان میں ایک بڑا طبقہ ہے جو کئی تبدیلیاں چاہتا ہے ،ایک انگریزی اخبار نے تو بھارت اور اسرائیل سے تعلقات کیلئے پوری مہم چلائی،اس قسم کی مہمات بڑی محنت سے چلائی جاتی ہیں ،لابیاں ہوتی ہیں اور کئی ممالک ایسی مہمات چلاتے ہیں ،نجم سیٹھی اور حسین حقانی کے موقف سب کو معلوم ہیں۔ان کا کہنا تھا کہ رجیم چینج میں یہی ہوا تھا کہ آپ اقتدار میں آئے تو کیسز معاف ہوجائیں گے ،خرم دستگیر سے پوچھیں کس نے کہا تھا عمران خان اپنا آرمی چیف لگائیں گے اور کس نے آئندہ 10,15سال اقتدار میں رہنا تھا ۔چیف الیکشن کمشنر جب ریٹائر ہونگے تو بہت سی باتیں پوچھی جائیں گی،چیف الیکشن کمشنر رجیم چینج کا حصہ ہیں انہوں نے انتخابات سے متعلق بیان کیوں بدلا سب سامنے آئے گا،الیکشن کمیشن نے حمزہ کو بچانے کیلئے مخصوص نشستوں کا فیصلہ روکا،ہائیکورٹ کیس ہی نہیں سن رہی،روزانہ سماعت ملتوی ہوجاتی ہے،لاہور ہائیکورٹ میں کیا ہورہا ہے باقی لوگ نہیں دیکھ رہے،فارن فنڈنگ کیس میں الیکشن کمیشن جان کر انتخابات کے قریب فیصلہ دے گا ،یہ چاہیں گے کہ الیکشن کے قریب فیصلہ دیں تاکہ پی ٹی آئی کو نقصان ہو،الیکشن کمیشن ممبران کی کیا حیثیت ہوگی جن کو لوٹوں نے منتخب کیا تھا ۔پاکستان میں ہمیشہ رجیم چینج فوج اور عدلیہ نے مل کر کی ہے ،اس میں ہم سیاستدانوں کا بھی بڑا قصور ہے۔ہم اسٹیبلشمنٹ سے اچھے تعلقات چاہتے ہیں اس میں کوئی دو رائے نہیں ہے ۔