اب جوڈیشل ایکٹواز کا دور نہیں رہا، ہر فصلہ قانون کے مطابق ہوگا، چیف جسٹس

اسلام آباد(نیوزایجنسیاں) چیف جسٹس پاکستان جسٹس عمر عطا بندیال نے سپریم کورٹ میں ایمپلائز اولڈ ایج بینیفٹ انسٹیٹیوشن (ای او بی آئی) میں خلاف ضابطہ بھرتیوں اور میگا کرپشن کیس کی سماعت کے دوران ریمارکس دیتے ہوئے کہا کہ اب جوڈیشل ایکٹوازم کا دور نہیں رہا، فیصلے قانون کے مطابق ہونگے، سپریم کورٹ نے جنوری 2011میں EOBIمیں بھرتیاں روکنے کا حکم دیا جس کی خلاف ورزی کی گئی جن افراد نے بھرتیوں پر اثر انداز ہونے کی کوشش کی ان کا نام نیب رپورٹ میں موجود ہے، سید خورشید شاہ کا نام بھی ای او بی آئی میں شامل ہے۔خورشید شاہ کے وکیل اعتزاز احسن نے کہا کہ خورشید شاہ اس وقت وزیر نہیں تھے جب یہ بھرتیاں ہوئیں، نیب کیس میں توہین عدالت کیسے ہو سکتی ہے؟ خورشید شاہ کا اس سے تعلق نہیں، ان کے سر پر توہین عدالت کی تلوار کیوں لٹک رہی ہے۔چیف جسٹس نے کہا کہ اگر توہین عدالت ہوئی ہے تو ذمہ داری ڈالنی ہے، عدالتی حکم کے برعکس تقرریاں تو ہوئی ہیں، دیکھنا ہے کس نے حکم کی خلاف ورزی کی صرف ذمہ داروں کیخلاف ہی کارروائی کرنا چاہتے ہیں نیب کو تفصیلات جمع کرانے کا آخری موقع دے رہے ہیں، سپریم کورٹ نے کیس کی سماعت ایک ماہ کیلئے ملتوی کردی۔