افغان زلزلہ متاثرین کی مدد کیلئے سب کو کردار اداکرنا چاہئے،مجلس تحفظ ختم نبوت ؐ

کوئٹہ(اسٹاف رپورٹر)عالمی مجلس تحفظ ختم نبوت بلوچستان کے ناظم تبلیغ مولانا مفتی محمد احمد خان نے کہا ہے کہ دکھی انسانیت کی خدمت ہم سب کا فرض ہے افغانستان کے زلزلہ متاثرین کی مدد کے لئے ہم سب کو مل کر اپنا کردار اداکرنا چاہیے۔ افغانستان کے مسلمان بھائیوں پر مشکل وقت ہے کسی صورت ان کا ساتھ نہیں چھوڑیں گے۔یہ بات انہوں نے مرکزی جامع مسجد قندھاری میں متاثرین زلزلہ کے لئے امدادی مہم کے موقع پر بات چیت کرتے ہوئے کی۔اس موقع پر باچا خان چوک پر امدادی کیمپ بھی لگایا گیا۔ مفتی محمد احمد خان نے کہا کہ دکھی انسانیت کی خدمت بھی عبادت ہے مسلمان کسی بھی ملک میں مصیبت و مشکل میں ہوں تو تمام مسلمانوں کی ذمہ داری ہے کہ وہ انکی مدد کریں اسی جذبے کے تحت افغان زلزلہ متاثرین کے لئے امداد جمع کی جارہی ہے مخیر حضرات سے اپیل ہے کہ وہ اس ضمن میں بھر پور تعاون کریں۔