بالکل صحیح، ادارے ہاتھ پر ہاتھ رکھ کر ایسے ہی بیٹھے رہیں، فوادچوہدری

اسلام آباد (این این آئی‘جنگ نیوز)وزیر خارجہ بلاول بھٹو کے بیان پر پی ٹی آئی رہنما فواد چوہدری نے کہاہے کہ بلاول بھٹو نے بالکل صحیح کہا ادارے ہاتھ پر ہاتھ رکھ کر ایسے ہی بیٹھیں جیسے سندھ کے بلدیاتی الیکشن میں ادارے بیٹھے‘ پیپلز پارٹی کے غنڈوں کو نہ روکیں اور الیکشن کے نام پر سلیکشن ہوتے رہنے دیں۔ اپنے بیان میں سابق وزیر نے کہاکہ پیپلز پارٹی کبھی نہیں ہارے گی‘ خطرہ تب ہے جب ادارے آئین پر عمل کریں اور انتخابات آزادانہ اور منصفانہ ہوں۔ایک اور بیان میں فواد چوہدری کا کہنا تھا کہ اداروں کو چاہئے کہ شریف، زرداری فیملی ‘ مریم نواز،خواجہ آصف سے درخواست کریں کہ اداروں کا دفاع نہ کیا کریں کیونکہ جب یہ اداروں کا جعلی دفاع کرتے ہیں تو عام آدمی اداروں سے متنفر ہوتا ہے کیونکہ عوام میں ان لوگوں کی کوئی ساکھ نہیں ہے الٹا اداروں کو اس کا نقصان ہوتا ہے۔