سلامتی کونسل تنازعات سے متعلق قراردادوں پر عملدرآمد کیلئے غور کرے،پاکستان

اسلام آباد (نمائندہ جنگ) پاکستان نے سلامتی کونسل پر زور دیا ہے کہ وہ جموں و کشمیر جیسے طویل مدتی تنازعات سے متعلق اپنی قراردادوں پر عملدرآمد کو یقینی بنانے کیلئے سنجیدگی سے غور کرے اور بڑھتے ہوئے چیلنجز سے نمٹنے کیلئے 15رکنی سلامتی کونسل کو مزید شفاف، جوابدہ، جامع اور جمہوری بنایا جانا چاہئے، اقوام متحدہ میں پاکستان کے قائم مقام مستقل نمائندہ عامر خان نے گزشتہ روز سلامتی کونسل کے کام کرنے کے طریقہ کار پر بحث کے دوران کہا کہ سلامتی کونسل کی ساکھ کیلئے اسکی قراردادوں پر سلیکٹیو عملدرآمد اور عدم نفاذ سے زیادہ نقصان دہ کچھ نہیں ہے،سلامتی کونسل کی قراردادوں پر عملدرآمد میں ناکامی اسکی ساکھ کو نقصان پہنچاتی ہے اور اقوام متحدہ کے چارٹر کے اصولوں اور تنازعات کے پیسفیک حل کیلئے ریاستوں اور عوام کے عزم کو ختم کردیتی ہے، انہوں نے سلامتی کونسل کی جامع اصلاحات پر جنرل اسمبلی کے بین الحکومتی مذاکرات (آئی جی این ) کے عمل کے ذریعے جلد اتفاق رائے کی امید ظاہر کی اور اسکے کام کرنے کے طریقوں میں بہتری لانے پر زور دیا،انہوں نے کہا کہ حالیہ برسوں میں کونسل کے کام کرنے کے طریقے اور عمل ایک ایسی سمت پر گامزن جو بین الاقوامی برادری اور اقوام متحدہ کی جنرل رکنیت کی توقعات پر پورا نہیں اترتے۔