امیر شیخ تمیم ، نائب وزیر اعظم سے ملاقات ، پاک قطر تعلقات پائیدار شراکت داری میں تبدیل ہو رہے ہیں ، جنرل باجوہ

اسلام آباد(اے پی پی) آرمی چیف کی قطری امیر شیخ تمیم اور نائب وزیر اعظم سے ملاقاتیں، باہمی دلچسپی کے امور، دفاعی و سیکورٹی تعاون پر تبادلہ خیال ، جنرل قمر جاوید باجوہ نے کہاہےکہ پاک قطر تعلقات پائیدار شراکت داری میں تبدیل ہورہےہیں،معززین نے خطے میں امن و استحکام کیلئے پاکستان کی کوششوں کو سراہا۔پاک فوج کے سربراہ جنرل قمر جاوید باجوہ نے دورہ قطر کے دوران امیر قطر شیخ تمیم بن حمد الثانی ، نائب وزیراعظم و وزیر مملکت برائے دفاعی و ریاستی امورخالد بن محمد العطیہ سے الگ الگ ملاقاتیں کیں جن میں باہمی دلچسپی کے امور، دفاعی اور سیکورٹی تعاون اور علاقائی ماحول پر تبادلہ خیال کیا گیا۔ پاک فوج کے شعبہ تعلقات عامہ(آئی ایس پی آر) کے مطابق پاک فوج کے سربراہ جنرل قمر جاوید باجوہ سرکاری دورہ پر قطر میں ہیں جہاں انہوں نے قطر کی اعلی قیادت سے ملاقاتیں کی ہیں ۔ آرمی چیف جنرل قمر جاوید باجوہ نے کہا کہ دونوں ممالک دوستانہ تعلقات اور بھائی چارے کے گہرے جذبے کی بے مثال تاریخ رکھتے ہیں، جو ایک پائیدار شراکت داری میں تبدیل ہو ر ہی ہے ۔ دونوں اطراف نے تمام شعبوں میں تعاون کو مزید بڑھانے کی اہمیت پر زور دیا۔معززین نے خطے میں امن و استحکام کے لیے پاکستان کی مسلسل کوششوں کو بھی سراہا ۔ دونوں برادر ممالک نے بہتر تعلقات کے لیے تعاون جاری رکھنے کا عزم کیا ۔