مقبوضہ کشمیر بھارتی فوج نے فرضی جھڑپ میں ایک اور نوجوان کو شہید کردیا،اسلحہ برآمد کرنے کا دعویٰ

سرینگر (کے پی آئی ) مقبوضہ کشمیر کے شمالی ضلع کپواڑہ کے کرناہ سیکٹر میں بھارتی فوج نے فرضی جھڑپ میں ایک اور کشمیری نوجوان کو شہید کردیا۔ بھارتی فوج کے دعوے کے مطابق کنٹرول لائن پر واقع امروہی کرناہ سیکٹر میں تعینات 6جیک رائفلز کے اہلکاروں نے علی الصبح مبینہ دہشت گردوں کے ایک گروپ کو دراندازی کی غرض سے متنازع علاقے میں داخل ہونے کی کوشش کرتے دیکھا۔ بھارتی دفاعی ترجمان کے مطابق گروپ کو چیلنج کیا گیا لیکن انہوں نے جواب میں فائرنگ کی۔ترجمان نے کہا کہ اسکے بعد طرفین کے درمیان گولیوں کا شدید تبادلہ ہوا جو کچھ دیر تک جاری رہا۔فائرنگ کے تبادلے میں ایک مبینہ درانداز مارا گیا 3 درانداز بچ نکلنے میں کامیاب ہوگئے۔ بھارتی فوج کے مطابق فرضی جھڑپ میں ایک اہلکار شدید زخمی ہوا جو بعد میں زخموں کی تاب نہ لا کر دم توڑ بیٹھا جس کی شناخت سپاہی جسویر سنگھ کے نام سے ہوئی۔۔بھارتی فوج کے دعوے کے مطابق شہید نوجوان کی تحویل سے ایک اے کے 47رائفل ،4پستول ،3اے کے 47میگزین ،تین پستول میگزین ،پانچ ہینڈ گرینیڈ اور دیگر اسلحہ بر آمد ہوا۔ جس کے بعد بھارتی فوج نے علاقہ میں مزید کمک طلب کی اور علاقہ کو گھیرے میں لیکر بڑے پیمانے پر تلاشی کاروائی شروع کی ۔ جو آخری اطلاع ملنے تک جاری تھی ۔دریں اثنا پولیس نے گذشتہ روز اونتی پورہ میں سے ایک نوجوان کو گرفتار کر کے اس سے اسلحہ برآمد ہونے اور مجاہدین سے تعلق کا الزام لگادیا۔