عالمی سازش کے کیساتھ احتساب بیانیہ کا بھی بھانڈا پھوٹ گیا،شیری رحمٰن

اسلام آباد (این این آئی)وفاقی وزیر برائے ماحولیاتی تبدیلی سینیٹر شیری رحمٰن نے کہاہے کہ ʼʼعالمی سازشʼʼکے بیانیہ کے ساتھ احتساب کے بیانیہ کا بھی بھانڈا پھوٹ گیا ہے۔ اپنے بیان میں انہوں نے کہاکہ عمران خان کے اپنے وزراء بھی اب تحریک انصاف کی انتقامی کاروائیوں اور من گھڑت کیسز کے گواہ بن گئے ہیں،جس بیانیہ کو لیکر عمران خان پونے چار سال مخالفین کو نشانا بناتے رہے وہ محض ایک کھوکھلا نعرہ نکلا۔ انہوں نے کہاکہ انہوں نے سیاسی مقاصد کیلئے قانون اور احتساب کے اداوں کو یرغمال بنایا، نام نہاد احتساب کے عمل میں کس کس سطح پر مداخلت کی گئی اس کی اب تحقیقات ہونی چاہئے۔ شیری رحمٰن کا کہنا تھا کہ پوری قوم کو پتا ہونا چاہئے کہ تحریک انصاف نے پونے چار سال اداروں اور قوانین کی کس طرح دھجیاں اڑائی،اقتدار ملک و قوم کی امانت ہوتا ہے۔ انہوں نے مزید کہا کہ دوسروں کو چور ڈاکو بولنے والوں نے اقتدار اور طاقت کا بے دریغ استعمال کیا، احتساب کا نعرہ لگا کر دوسروں کو چور ڈاکو کہنے والوں کا بھی اب احتساب ہونا چاہئے۔