سندھ حکومت کی کارکردگی بارش اور نالوں میں بہہ گئی، حلیم عادل شیخ

کراچی (آئی این پی)پی ٹی آئی کے رہنما اور سندھ اسمبلی میں اپوزیشن لیڈر حلیم عادل شیخ نے کہا ہے کہ سندھ حکومت کی کارکردگی بارش اور نالوں میں بہہ چکی ہے۔شہر میں ہونے والی موسلادھار بارش کے بعد پیدا ہونے والی صورتحال کے حوالے سے میڈیا سے گفتگو میں حلیم عادل شیخ نے کہا کہ بارش کے بعد ہر سال کی طرح کورنگی کاز وے پانی سے بھرا ہوا ہے،14سال ہوگئے سندھ حکومت کورنگی کا زوے نہیں بنا سکی، ہرسال بارش میں کورنگی کاز وے ڈوبا ہوا ہوتا ہے۔انہوں نے کہا کہ ملیرندی میں کرش پلانٹس دیگر چیزیں بناکر پانی کے بہا کو روکا جارہا ہے وزرا شارع فیصل پر تصویریں بنا کر روانہ ہوئے ،کیا انہیں شرم نہیں آتی؟محمودآباد نالہ، جوہر، گلشن ودیگر علاقے ڈوبے ہوئے ہیں، ایڈمنسٹریٹر ماڈل نمبر2021ان ڈوبے ہوئے لوگوں کے پاس جاتے، وزیراعظم عمران خان نے کراچی کے نالے صاف کرائے۔پی ٹی آئی رہنما کا کہنا تھا کہ1100ارب کے پیکیج میں35 ارب نالوں کی صفائی پر خرچ ہوئے، وفاقی حکومت کے ذمے صرف کراچی کے بڑے نالے صاف کرانا تھا۔ 500سے زائد چھوٹے نالے سندھ حکومت نے صاف کرانے تھے جو نہیں ہوئے، سندھ حکومت کی کارکردگی بارش اور نالوں میں بہہ چکی ہے۔صوبائی وزرا کی پھرتیاں صرف رین ایمرجنسی فنڈپرہاتھ صاف کرنے کےلئے تھیں، جب تک اپنی کارکردگی ٹھیک نہیں کروگے ہم بولتے رہیں گے۔