وزیراعلیٰ کی مزید بارشوں کی پیشگوئی پر متعلقہ اداروں کو الرٹ رہنے کی ہدایت

کوئٹہ (خ ن ) وزیراعلیٰ میر عبدالقدوس بزنجونے مزید بارشوں کی پیشگوئی پر پی ڈی ایم اے، انتظامیہ اور متعلقہ اداروں کو الرٹ رہنے کی ہدایت دیتے ہوئے کہا ہے کہ تمام ادارے مستعد اور فعال رہتے ہوئے ہر قسم کی صورتحال سے نمٹنے کی تیاری مکمل رکھیں ۔وزیراعلیٰ نے جاری پیغام میں کہا کہ عوام کی جان ومال کے تحفظ کےلئے تمام وسائل دستیاب رکھے جائیں،سیکرٹری آبپاشی ڈیموں کی صورتحال کی موثر نگرانی اور بھاری مشینری کی دستیابی ممکن بنائیں ۔ وزیراعلیٰ نے ضلعی انتظامیہ کو بھی ہدایت دیتے ہوئے کہا کہ پانی کی گزرگاہوں اور نالوں کی صفائی یقینی بنائی جائے اورنشیبی علاقوں کی آبادیوں کو محفوظ مقامات پر منتقل کیا جائے۔وزیراعلیٰ نے کہا کہ محکمہ مواصلات اور این ایچ اے قومی شاہراہوں اور سڑکوں پر ٹریفک کی روانی یقینی بنائیں ، پی ڈی ایم اے متاثرہ علاقوں میں امدادی کاروائیوں کو مزید مربوط بنائے ۔ انہوں نے چیف سیکرٹری کو ہدایت کی کہ تمام متعلقہ اداروں میں مربوط کوآرڈینیشن قائم کی جائے۔انہوں نے تمام ڈپٹی کمشنرز کو سختی سے ہدایت کی کہ وہ ضلعی مشینری کے ساتھ اپنے ضلعوں میں موجود رہیں، دوران عید امن وامان اور صفائی کی صورتحال کو بہتر بنایا جائے ۔ زیراعلیٰ نے سیکرٹری بلدیات کو ہدایت دی کہ ایڈمنسٹریٹرز صفائی کے عملے کے ساتھ حاضر رہیں۔