اسلام محبت،یگانگت اور امن کا درس دیتا ہے، تنظیم الاخوان

کوئٹہ(پ ر) عبدالقدیر اعوان شیخ سلسلہ نقشبندیہ اویسیہ و سربراہ تنظیم الاخوان پاکستان نے جمعہ کے اجتماع سے خطاب کرتے ہوئے کہا ہے کہ حج کا موقع ہے،مخلوق میں اجتماعیت بڑی بنیادی شےہے۔ایک تکبیر پر لاکھوں لوگوں کا لبیک کہنا اتنی بڑی مرکزیت کسی قوم کے پاس نہیں ہے یہ اللہ کریم کی بہت بڑی عطا ہے۔اللہ کریم کا احسان ہے کہ ہمیں مرکزیت عطا فرمائی۔بیت اللہ شریف میں حج کے موقع پر انسانیت کے لیے اُمت کے لیے دعائیں ہورہی ہیں۔اس وقت امت مسلمہ کو دعاؤں کے ساتھ عملی صورت کوبھی اختیار کرنے کی ضرورت ہےاللہ کریم اسی طرح امت مسلمہ کو اتحادو اتفاق عطا فرمائے۔انہوں نے کہا کہ اسلام محبت،یگانگت اور امن کا درس دیتا ہے۔حج کے موقع پر ہر بندہ اللہ کے حضور حاضر ہوتا ہے اور پکارتا ہے کہ اے اللہ میں حاضرہوں جو کچھ پیچھے ہو گزرا اُس کی معافی چاہتا ہوں آئندہ نہیں کرووں گا نبی کریم ﷺ کا ارشاد ہے کہ حج کے بعد بندہ ایسا ہو جاتا ہے جیسے ابھی پیدا ہوا ہے اس طرح گناہوں سے پاک ہو جاتا ہے۔اللہ کریم کے سامنے ہتھیار ڈال دینے کا نام حج ہے۔اپنے آپ کو اللہ کے سپرد کر دینا چاہیے۔حج کے موقع پر ساری دنیا کو یہ سبق جاتا ہے کہ اسلام اتحاد اور امن کو پسند کرتا ہے۔