کلمہ حق کہنے پر عمران خان کو ہر طبقے کی حمایت حاصل ہورہی ہے، PTI

لاہور(خصوصی رپورٹر)پی ٹی آئی رہنمائوں ڈاکٹر یاسمین راشد، حماد اظہر اورسینیٹراعجاز چوہدری نے مذہبی جماعتوں کے رہنماؤں کے ہمراہ اہم پریس کانفرنس کرتے ہوئے کہا ہے کہ عمران خان نے جو کلمہ حق کی آواز اٹھائی اس پر ہر طبقے سے سپورٹ مل رہی ہے۔ د ینی جماعتوں کی سپورٹ کے بعد20 سیٹوں پر ہماری جیت یقینی ہو گئی، پی ٹی آئی سینٹرل پنجاب کی صدر ڈاکٹر یاسمین راشد نے کہاکہ عمران خان اس بات پر یقین رکھتا ہے کہ پاکستان آزاد ملک بنایا گیا تھا، افسوس سے کہنا پڑتا ہے کہ آنے والی حکومتیں ہمیں محکومی کی جانب لے کر گئیں۔مذہبی جماعتوں سپورٹ رہی تو ہم پاکستان کی حقیقی منزل تک پہنچیں گے۔ حماد اظہر نے کہاکہ پنجاب میں ہونے والا ضمنی الیکشن ایسی صورت اختیار کر گیا ہے جو پہلے کبھی نہ تھی۔ عوام کی سپورٹ تحریک انصاف کے ساتھ بڑھ رہی ہے۔ تحریک دعوت الحق۔ اسلامی جمہوری اتحاد۔ متحدہ جمعیت اہلحدیث اتحاد علماء کونسل سمیت متعدد جماعتوں کی جانب سے پی ٹی آئی کی حمایت پر انکے شکر گزار ہیں۔د ینی جماعتوں کی جانب سے حمایت کے بعدضمنی الیکشن میں20 سیٹوں پر ہماری جیت یقینی ہو گئی ہے۔سینیٹر اعجاز چوہدری نے کہاکہ جن تنظیمات نے حمایت کا اعلان کیا وہ دعوت حق کے داعی ہیں۔ پاکستان میں عمران خان واحد وزیراعظم تھا جس نے حلف اٹھانے کے بعد ملک کو مدینے جیسی ریاست بنانے کی جدوجہد کی۔پیر حبیب سندر شریف والے نے کہاکہ موجودہ حکومت نے اپنی کرپشن چھپانے کیلئے جس طرح لوگوں کو قتل اور ذلیل کیا وہ ناقابل برداشت ہے۔