سیکرٹری جنرل او آئی سی اور امریکی وزیر خارجہ کی اُمت مسلمہ کو عید کی مبارکباد

اسلام آباد (نامہ نگار خصوصی) اسلامی تعاون تنظیم (او آئی سی)کے سیکرٹری جنرل حسین ابراہیم طحہ نے عیدالاضحیٰ1443 کے موقع پر امت مسلمہ کو مبارکباد اور ان کے لیے نیک خواہشات کا اظہار کیاہے۔ عیدالاضحیٰ کے موقع پر انہوں نے او آئی سی کے رکن ممالک کے تمام سربراہان کو بھی مبارکباد دی ہے۔ ہفتہ کو جدہ میں او آئی سی کے ہیڈ کوارٹر سے جاری ہونے والے ایک بیان میں حسین ابراہیم طحہ نے کہا کہ عید ایسے وقت میں آئی جب کئی رکن ممالک شدید مشکلات سے گزر رہے تھے۔ سیکرٹری جنرل نے اللہ تعالی سے دعا کی کہ وہ اس موقع کو فوری راحت کا آغاز بنائے جو امت کے جذبے کو تقویت بخشے اور اسے مسلم دنیا کے تمام ممالک میں استحکام، امن اور خوشحالی کا احساس دلائے ،علاوہ ازیں امریکی وزیرخارجہ نے دنیا بھر کے مسلمانوں کو عیدالاضحیٰ کی مبارکباد دیتے ہوئے تمام حجاج کرام کو بھی مبارک باد پیش کی ہے ، تفصیلات کے مطابق امریکی وزیرخارجہ انٹونی بلنکن نے سماجی رابطے کی ویب سائٹ ٹوئٹر پر دنیا بھر کے مسلمانوں کو عید کی مبارکباد دیتے ہوئے کہا کہ عید انسانی ہمدردی اورغریبوں کی مدد کا درس دیتی ہے۔