عمران قیامت تک سڑکوں پر دھکے کھائے گا،اقتدار میں نہیں آسکتا،احسن اقبال

10 جولائی ، 2022

لاہور(نمائندہ جنگ ،نیوز ایجنسیاں)سینئر رہنما ن لیگ و وفاقی وزیر برائے منصوبہ بندی احسن اقبال نے کہا کہ ریاست مدینہ کی پہچان بد اخلاقی نہیں تھی، عمران خان نفرتوں کی دیواریں کھڑی کر رہے ہیں،قانون اجازت دیتا ہے کہ ہلڑبازی کرنیوالوں کیخلاف قانونی کارروائی کروں ،واقعے میں خواتین ، بچے شامل ،اسلئے کارروائی نہیں کر رہا، اگر ایسے رویوں کی حوصلہ شکنی نہ کی تو لبنان کی طرح خانہ جنگی ہو سکتی ہے،عمران قیامت تک سڑکوں پر دھکے کھائے گا، اقتدار میں نہیں آسکتاعمران اقتدار جانے کے بعد سڑکوں پر دھکے کھا رہے ہیں۔پیپلز پارٹی کے رہنما قمر زمان کائرہ نے کہا کہ احسن اقبال کے ساتھ واقعہ قابل مذمت ہے ،PTIنے گالم گلوچ کا کلچر عام کردیا ،ن لیگی رہنما عظمیٰ بخاری نے کہا کہ خواتین اوربچوں کو ڈھال بنانا عمران کا پرانا وتیرہ ہے۔ماڈل ٹاؤن لاہور میں پریس کانفرنس کرتے ہوئے احسن اقبال نے مزید کہا کہ اسلام آباد سے لاہور آتے وقت بھیرہ پر تحریک انصاف سے ہمدردی رکھنے والی فیملی سے تلخ کلامی واقعہ افسوسناک ہے،میرے پاس دو راستے تھے قانون کا راستہ اختیار کرتا ،سی آر پی یا ضابطہ فوجداری کے تحت کارروائی کر سکتا تھا لیکن خواتین و بچوں کی وجہ سے کارروائی نہیں کروں گا، ایف آئی آر عوام کی عدالت میں درج کروائوں گا کہ اس قسم کے رویوں کی حوصلہ شکنی کریں، عمران نیازی کو کرکٹ میں لانے والا ماجد خان تھا جسے چھرا گھونپا، اگر عمران خان کو نوازشریف زمین نہ دیتے تو شوکت خانم اور نمل کیلئے جگہ تلاش کرتا،اگر جہانگیر ترین جہاز نہ دیتا اور علیم خان وسائل استعمال نہ کرتا تو سیاست میں نہ آتا،عمران خان کی اندھی تقلید میں جو لوگ غلط حرکتیں کررہے ہیں انہیں کہوں گا کہ کیا وہ آپ کے ساتھ مخلص ہے؟قمر زمان کائرہ نے مزید کہا کہ احسن اقبال کے ساتھ کل اور اس سے پہلے اس طرح کے ہونے والے واقعات قابل مذمت ہیں، قمر زمان کائرہ نے کہا کہ اس طرح کے واقعات میں اضافہ ہوتا جا رہا ہے، ہمارے ہاں جمہوریت کو آگے نہیں بڑھنے دیاگیا۔عظمیٰ بخاری نے مزید کہا کہ ہم نے بہت برداشت کرلیا ، اپنے کارکنوں کی تربیت کرنا سیاسی جماعتوں کی ذمہ داری ہے، عمران خان زمین پر اتریں تو پتہ چلے گا لوگ ان کے ساتھ کیا کرتے ہیں،عمران خان دوسروں کو چور چور کہتے ہیں، انکو آٹا، چینی چوری کا جواب دینا ہے، ہم ان پرکیسز نہیں بنا رہے، قانون خود اپنا راستہ بنا رہا ہے۔