انتخابی مہم چلانے کیلئے ایاز صادق،سلمان رفیق وزارتوں سے مستعفی

لاہور، اسلام آباد (نمائندگان جنگ ،نیوز رپورٹر ، مانیٹرنگ سیل)انتخابی مہم چلانے کیلئے سرادار ایاز صادق اورخواجہ سلمان رفیق نے وزارتوں سے استعفیٰ دیدیا، استعفے لاہور کے ضمنی انتخابات میں پارٹی امیدواروں کو ہر صورت جتوانے کیلئے مسلم لیگ ن کی حکمت عملی کا حصہ ہیں۔الیکشن کمیشن کے ضابطہ اخلاق کے باعث دونوں رہنماؤں نے وزارتوں سے استعفیٰ دیا ہے، خیال رہے کہ 17 جولائی کو پنجاب کے 20، حلقوں میں ضمنی الیکشن ہونے ہیں، یہ نشستیں منحرف پی ٹی آئی ارکان کے ڈی سیٹ ہونے کی وجہ سے خالی ہوئی ہیں، ایاز صادق وفاقی وزیر برائے اقتصادی امور جبکہ سلمان رفیق پنجاب کے وزیر برائے اسپیشلائزڈ ہیلتھ کیئر اینڈ میڈیکل ایجوکیشن تھے۔ایاز صادق نے اپنا استعفی وزیر اعظم کو بھجوا دیا اور اس وجہ ذاتی لکھی ،سلمان رفیق نے بھی استعفی کی وجہ ذاتی وجوہات تحریر کیا ہے،خواجہ سلمان رفیق نے اپنا استعفی وزیراعلی پنجاب کو بجھوایاجس کو منظور کر لیا گیااور رسمی منظوری کے گورنر پنجاب کو بھجوا دیا گیا۔ادھروزیراطلاعات ونشریات مریم اورنگزیب نے اپنے بیان میں کہا ہے کہ سردار ایاز صادق اور سلمان رفیق اپنی اپنی وزارت کے عہدے سے مستعفی ہوگئے ہیں ۔ انہوں نے کہا ہے کہ دونوں رہنماؤں نے الیکشن ضابطے کی پاسداری میں استعفے د ئیے ہیں ۔ ایاز صادق اور سلمان رفیق کے حلقے میں انتخاب ہورہا ہے ۔ دونوں راہنماؤں نے وزارتوں سے استعفے دئیے تاکہ الیکشن مہم میں حصہ لے سکیں ۔ انتخابات کے بعد وہ اپنی وزارت کی ذمہ داریاں پھر سے سنبھال لیں گے۔