بھارتی فوج کا مبینہ دراندازی کی کوشش ناکام بنانے کا دعوی

سرینگر (کے پی آئی ) مقبوضہ کشمیر کے شمالی ضلع کپوارہ کے کرناہ سیکٹر میں بھارتی فوج نے مبینہ دراندازی کی کوشش ناکام بنانے کا دعوی کرتے ہوئے کہا ہے کہ فائرنگ کے تبادلے میں ایک فوجیاہلکار اور ایک ملی ٹینٹ ہلاک ہوئے۔ بھارتی دفاعی ترجمان نے دعوی کیا کہ حد متارکہ پر واقع امروہی کرناہ سیکٹر میں تعینات 6جیک رائفلز کے اہلکاروں نے علی الصبح ملی ٹینٹوں کے ایک گروپ کو دراندازی کی غرض سے آتے دیکھا۔دفاعی ترجمان نے کہا کہ ملی ٹینٹ کے گروپ کو چیلنج کیا گیا لیکن انہوں نے جواب میں فائرنگ کی۔ترجمان نے کہا کہ اسکے بعد طرفین کے درمیان گولیوں کا شدید تبادلہ ہوا جو کچھ دیر تک جاری رہا۔فائرنگ کے تبادلے میں ایک ملی ٹینٹ مارا گیا جبکہ 3ملی ٹینٹ واپس فرار ہونے میں کامیاب ہوئے۔ تصادم کے دوران ایک فوجی اہلکار شدید زخمی ہوا جو بعد میں زخموں کی تاب نہ لا کر دم توڑ بیٹھا۔مہلوک فوجی اہلکار کی سپاہی جسویر سنگھ کے بطور ہوئی ۔ مارے گئے ملی ٹنٹ کی تحویل سے ایک اے کے 47رائفل ،4پستول ،3اے کے 47میگزین ،تین پستول میگزین ،پانچ ہتھ گولے اور دیگر اسلحہ بر آمد کرنے کا بھی دعوی کیا گیا۔ بھارتی فوج نے علاقہ میں مزید کمک طلب کی اور علاقہ کو گھیرے میں لیکر بڑے پیمانے پر تلاشی کاروائی شروع کی ۔ جو آخری اطلاع ملنے تک جاری تھی ۔دریں اثنا پولیس نے گذشتہ روز اونتی پورہ میں ایک ملی ٹینٹ کو گرفتار کر کے اسکی تحویل سے اسلحہ بر آمد کرنے کا دعوی کیا۔