مقبوضہ کشمیر ،بادل پھٹنے سے کم از کم 16 ہلاک 40 لاپتہ

سرینگر (ایجنسیاں) مقبوضہ کشمیر میں بادل پھٹنے (کلائوڈ برسٹ) سے شدید بارش اور سیلاب کے نتیجے میں کم از کم 16افراد ہلاک اور 40سے زائد لاپتہ ہوگئے۔ مندر کے قریب خیمے تباہ ہوگئے، یہ واقعہ امرناتھ مندر کے قریب ہوا۔ امدادی کارروائیوں کیلئے فوج طلب کر لی گئی،15 ہزار سے زائد یاتری محفوظ مقامات پر منتقل کر دیئے گئے۔ یاتریوں کو بچانے کیلئے امدادی کارروائیاں جاری ہیں۔ ترجمان بھارتی بارڈر پولیس کے مطابق خطرے کے پیش نظر امرناتھ یاترا کو وقتی طور پر روک دیا گیا ہے۔ لیفٹیننٹ گورنر نے وزیراعظم مودی اور وزیر داخلہ کو واقعہ سے متعلق بریفنگ دی ہے۔ بھارتی میڈیا کے مطابق شام ساڑھے 5بجے بادل پھٹا جس کے نتیجے میں مندر کے قریب خیمے تباہ ہوگئے۔ سرینگر سے کے پی آئی کے مطابق مقبوضہ کشمیر میں امرناتھ گپھا کے بالکل قریب بادل پھٹ گئے جس کے نتیجے میں گھپا کے اوپرے حصے سے بہت مقدار میں پانی نیچے آیا جس نے اپنے ساتھ بھاری بھر کم پتھر اور بہت سارا ملبہ بھی لایا۔ پانی کے تیز ریلے نے گھپا کے نزدیک یاتریوں کیلئے بنائے گئے خیموں اور لنگروں کو بہا لیا جس کے نتیجے میں درجنوں یاتری اسکی زد میں آئے۔ شام دیر گئے تک کئی خواتین سمیت 16افرادکی لاشیں نکالی گئی تھیں جبکہ باور کیا جارہا ہے کہ قریب40 سے زائد لاپتہ ہیں۔ جس وقت یہ واقعہ پیش آیا اس وقت درجنوں یاتری لنگر کے ایک حصے میں سو رہے تھے اور درجنوں افراد کھانا وغیرہ کھا رہے تھے۔ حکام کا کہنا ہے کہ ابھی لاشوں کی شناخت نہیں کی جاسکتی اور نہ مصدقہ طور پر بتایا جاتا ہے کہ کتنے لوگوں کی ہلاکت ہوئی۔ علاقے میں ریسکیو ٹیموں نے بڑے پیمانے پر تلاشی آپریشن شروع کیا ہے وہیں ہیلی کاپٹر کی مدد بھی لی جا رہی ہے۔