جارج فلوئیڈ کے قاتل پولیس اہلکار کو شہری حقوق کی خلاف ورزیوں پر مزید21 برس قید

واشنگٹن (جنگ نیوز )امریکی شہر منی ایپلس کی ایک عدالت نے جمعرات کے روز سابق پولیس افسر ڈیرک شاوین کو سیاہ فام جارج فلائیڈ کے شہری حقوق کی خلاف ورزی کرنے پر مزید 21 برس قید کی سزا سنائی۔ عدالت کے مطابق شہری حقوق کی خلاف ورزیاں مئی 2020میں فلوئیڈ کی موت کا باعث تھیں۔سابق پولیس اہلکار ڈیرک شاوین کو سیاہ فام جارج فلوئیڈ کی گردن پر گھٹنا رکھ کر انہیں قتل کرنے کے جرم میں پہلے ہی 22 برس قید کی سزا سنائی گئی تھی۔ فلوئیڈ کی موت کے بعدبلیک لائیوز میٹر نامی احتجاجی تحریک شروع ہوئی تھی۔سابق پولیس افسر شاوین نے منی ایپلس میں کارنر اسٹور کے باہر جارج فلوئیڈ کو نو منٹ سے زیادہ وقت تک فرش پر اپنے گھٹنے کے نیچے دبائے رکھا تھا، جس دوران سیاہ فام فلوئیڈ دم گھٹنے کے صدا لگاتے رہے تاہم وہ نہیں رکے اور اس طرح دم گھٹنے کے سبب ان کی موت ہو گئی تھی۔