مجھے دو دن میں پی ٹی آئی چھوڑنے کی دھمکی دی گئی‘ فیاض الحسن چوہان

اسلام آباد (جنگ رپورٹر) عمران خان کے میڈیا ایڈوائزر فیاض الحسن چوہان نے کہا ہے کہ انہیں مبینہ نامعلوم موبائل کالروں کی جانب سے ٹیلی فون پر دھمکیاں دی جارہی ہیں، خفیہ ادارے مریم نواز شریف کے سٹرٹیجک میڈیا سیل کا فوری نوٹس لیں۔ ایک بیان میں فیاض الحسن چوہان نے کہا کہ مریم نواز کا سٹرٹیجک میڈیا سیل بڑی خوبصورتی سے اداروں اور عوام کے درمیان خلیج پیدا کر رہا ہے، مجھے ’’نو کالر آئی ڈی‘‘ سے کال آئی ہے اور دو دن کے اندر اندر پی ٹی آئی چھوڑنے کو کہا ہے بصورت دیگر سنگین نتائج بھگتنے کی دھمکیاں دی گئی ہیں۔ نامعلوم نمبر سے آنے والی کال سے یہ تاثر دیا گیا کہ کسی خفیہ ادارے کی جانب سے آئی ہے۔ انہوں نے کہا ہے کہ مریم نواز اس وقت عمروعیار کی سیاست پر گامزن ہیں لیکن اس قسم کے اوچھے ہتھکنڈوں سے پی ٹی آئی کے قائدین اور کارکنوں کے حوصلے پست نہیں کئے جاسکتے۔